ZAO LA MBAAZI KUUZWA KWA MFUMO WA STAKABADHI GHALANI TANDAHIMBA

Posted on: August 9th, 2023

Na Kitengo cha Mawasiliano

Mkuu wa Wilaya ya Tandahimba Mhe.Kanali Patrick Sawala amewasistiza Wakulima wa Tandahimba kutumia mfumo  wa stakabadhi ghalani  kwa zao la mbaazi kwenye mfumo huu wa mwaka 2023/2024

Akizungumza na Viongozi wa Vyama vya msingi (Amcos) Watendaji wa Kata na Madiwani kwa nyakati tofauti katika ukumbi wa Mikutano wa Halmashauri  Agosti 9,2023 amesema kuwa zao la Mbaazi linaanza rasmi katika msimu huu kuuzwa katika mfumo wa stakabadhi ghalani ambapo mkulima atafaidika na zao lake

" Zao hili halikuwepo katika mfumo wa stakabadhi ghalani lakini  kwenye msimu huu wa mwaka 2023/2024 litaanza rasmi hivyo wahimizeni Wakulima katika maeneo yenu kupeleka Mbaazi zao katika Amcos zilizopo katika maeneo yao kuepuka uuzwaji holela ambao unamkandamiza mkulima," amesema Dc Sawala

Naye Meneja Mkuu wa Chama Kikuu cha Ushirika TANECU  Ndg.Mohamed Mwing'uku amesema kuwa tayari vifungashio vipo tayari  katika  Amcos hivyo Wakulima wazingatie Ubora kwa kuepuka kuchanganya vitu ambavyo sio mbaazi  wakati wa kuziandaa ili ziweze  kuuzwa kwa bei ya juu