Wauzaji wa pembejeo feki kuchukuliwa hatua kali za sheria

Posted on: May 31st, 2022

Na Kitengo cha Habari na Mawasiliano

Mkuu wa Wilaya ya Tandahimba Mhe.Kanali Patrick Sawala  amesema Serikali itawachukulia hatua kali za kisheria  watakao jihusisha na uuzaji wa pembejeo feki na watakao gawa pembejeo za ruzuku kwa wasiohusika

Ameyasema hayo  leo Mei 31,2022  viwanja vya  shule ya msingi Amani katika mkutano wa hadhara ambapo ametoa utaratibu wa ugawaji wa  pembejeo za ruzuku  kwa wakulima

“Wale wanaotaka kujihusisha na uuzaji wa pembejeo feki waache mara moja,kufanya hivyo ni kosa la uhujumu uchumi na hatutakuvumilia  uhujumu uchumi wa Tandahimba  lakini pia pembejeo hizi zimetolewa kwa wakulima ambaye atatoa pembejeo hizi kwa asiyehusika naye tutamchukulia hatua,”amesema Dc Sawala  

Amesema zoezi la ugawaji wa pembejeo za ruzuku utakuwa wa wazi  ili kila mkulima ambaye anastahili aweze kupata pemjeo hizo na kusistiza kuwa kila mkulima ahakikishe shamba lake lipo safi ili pembejeo hizo zifanye kazi ipasavyokuongeza uzalishaji

Aidha amesema kuwa tayari pembejeo hizo zimeanza kuwasili katika maghala  ambapo katika mgao wa pembejeo hizo wamezingatia uzalishaji wa msimu uliopita wa mwaka 2021/2022

Katika mgao wa Jumla tutapewa tani 3769.709 za Salfa ya unga,Viuatilifu vya kudhibiti mbu wa korosho tutapewa lita 44334,Viuatilifu vya kudhibiti vidungata tutapewa lita 14777,Viuatilifu vya kudhibiti ubwili unga na braiti  tutapewa  lita 132995,viuatilifu vya kudhibiti ubwili unga pekee tutapewa lita 29555 na mabomba ya kupulizia 517 ambapo pembejeo hizo zinaendelea kuwasili katika maghala