WATUMISHI HALMASHAURI YA TANDAHIMBA WAPATIWA ELIMU YA UWEKEZAJI NA BENKI KUU YA TANZANIA( BOT).

Posted on: February 20th, 2024

Na.Kitengo cha Mawasiliano.

Watumishi wa Halmashauri ya Wilaya ya Tandahimba  wamepatiwa Elimu  ya Uwekezaji kwenye Dhamana za Serikali na Benki Kuu ya Tanzania (BOT) ili kunufaika na Uwekezaji huo.

Elimu hiyo imetolewa leo Februari 20,2024  na Wawezeshaji kutoka  Benki Kuu ya Tanzania( BOT) kwenye ukumbi wa Mikutano wa Halmashauri ya Wilaya ya Tandahimba.

Akitoa elimu hiyo Mwezeshaji Ndugu.Benn Mgowole  amesema faida za kuwekeza katika Dhamana za Serikali ni Salama kwani Serikali haitarajiwi kukiuka mategemeo ya wadai wake wakati wa malipo,Dhamana za Serikali zinaweza kutolewa kama Dhamana kwa ajili ya kupata mikopo katika taasisi za fedha nchini lakini pia zina viwango  vya riba vinavyoridhisha.

Dhamana ya Serikali ni aina ya Uwekezaji unaotegemea mpango wa ndani wa ukopaji wa Serikali ambapo mwekezaji anatoa mkopo kwa Serikali kwa malipo ya kuponi iliyokubaliwa na baada ya muda wa dhamana kuisha kiasi cha awali cha uwekezaji hurudishwa kwa mwekezaji kwa asilimia 100.

Benki Kuu ya Tanzania imekuwa ikiendesha minada ya Dhamana za Serikali kulingana na Mpango  wa Ukopaji wa Serikali kutoka Masoko ya mitaji ya ndani ya nchi bila kuathiri mikopo kwa sekta binafsi.