Watoto 94 wenye mahitaji maalum wapimwa afya Siku ya Maadhimisho ya Mtoto wa Afrika

Posted on: June 15th, 2022

Na Kitengo cha Habari na Mawasiliano

Halmashauri ya Wilaya ya Tandahimba imeadhimisha siku ya Mtoto wa Afrika Kiwilaya kwa kuwapima afya watoto wenye mahitaji maalum katika shule ya Msingi Mji mpya sambamba na utoaji wa elimu ya lishe kwa wapishi wa watoto hao

Zoezi la kuwapima afya watoto hao limefanyika shuleni hapo leo Juni 15,2022 ambapo watoto 94 wamepimwa malaria na kuangalia hali ya macho  kati yao watoto 32 wamebainika kuwa na malaria,watoto 13 wamebainika kuwa na tatizo la macho ambapo wote wamepatiwa matibabu

Akizungumzia tukio hilo Afisa Maendeleo ya Jamii Wilaya ya Tandahimba Ndugu. Aloyce Massau  amesema kuwa hatua hiyo ya kuwapima afya imewezesha kufahamu afya zao

“Leo  katika kuadhimisha siku hii kiwilaya sisi Halmashauritumeona tuitumiesiku hii kuwapima afya watoto wetu wenye mahitaji maalum,kwasababu watoto hawa wanaishi hapa bweni kwaiyo kwa kuwapima afya tutajua maendeleo yao ya kiafya lakini pia wapishi wanapewa elimu ya kuwaandalia watoto lishe bora kwa kuzingatia makundi matano ya chakula,”amesema Ndg. Massau

Naye Afisa Elimu Maalum Halmashauri ya Wilaya ya Tandahimba Ndg.Thadei Luhumbo  amemshukuru na kumpongeza Mkurugenzi Mtendaji kwa kuthamini afya za watoto hao ambao huwa wanapata changamoto mbalimbali za kiafya

Maadhimisho ya Mtoto wa Afrika hufanyika Juni 16 kila mwaka  ambapo kauli mbiu ya mwaka huu 2022 ni “Tuimarishe ulinzi wa Mtoto,Tokomeza Ukatili dhidi yake,Jiandae Kuhesabiwa”