Wadau wa Elimu waweka mikakati ya kuongeza Ufaulu na kuondoa ziro

Posted on: January 26th, 2022

Na Kitengo cha Habari na Mawasiliano

Mkuu wa Wilaya  ya Tandahimba Mhe.Kanali Patrick Sawala amesema kuwa maazimio ambayo wameyaweka katika kikao cha wadau wa elimu yakisimamiwa na kufuatiliwa yataleta matokeo yenye tija na kuongeza ufaulu

Ameyasema hayo leo Januari 25,2022 kwenye kikao maalum cha wadau wa Elimu  ambacho kimeazimia kuongeza ufaulu kwa kuyasimamia yale ambayo wadau wamekubaliana katika kikao hicho sambamba na kuyafuatilia kuhakikisha malengo yanafikiwa

“Tunaondoka hapa na kamapeni yetu ya kuondoa ziro  kwa kidato cha nne na kidato cha pili,lakini pia kwa darasa la nne tunaondoa alama za D&E kwenye matokeo yao kwa kusimamia maazimio yetu ambayo tumejiwekea,hatujachelewa muda wa kufanya vizuri tunao,”amesema Dc Sawala

Aidha amesema kuwa ili mafanikio yawe mazuri zaidi ushirikiano kati ya mwalimu,mzazi na mwanafunzi  uimarishwe ili kuweza kufuatilia  maendeleo ya mwananfunzi  kwa karibu na hivyo kuwasistiza wazazi kutoa ushirikiano wa dhati kwa walimu

Naye Mkurugenzi Mtendaji wa Halmashauri ya Wilaya ya Tandahimba ndugu Mussa Gama amesema kwakuwa maazimio yamefanyika kwa pamoja  jukumu kubwa ni wakuu wa shule Sekondari na Msingi,waratibu kata,watendaji kata na maafisa tarafa kuhakikisha wanatekeleza wajibu wao ili kufikia malengo

“Naamini katika vitendo zaidi kila mmoja atimize wajibu wake ili tuweze kufikia maazimio yetu tuliyokubaliana hapa wote kwa pamoja suala la lishe tutalisimamia ili wanafunzi waweze kusoma na kuelewa wanahitaji kupata chakula  hili tutalisimamia,”amesema Mkurugenzi

Nao washiriki wa kikao  hicho wamempongeza Dc kwa kuahidi kushirikiana nao ili kuinua Elimu Wilaya ya Tandahimba na kuahidi kuendelea kutoa ushirikiano  ili kuyafikia maazimio