Viwanda vidogo vya kukamua mafuta ya alizeti kujengwa Litehu,Mahuta na Namikupa

Posted on: February 1st, 2022

Na  Kitengo cha Habari na Mawasiliano

Mkurugenzi Mtendaji Halmashauri ya Wilaya ya Tandahimba  ndugu Mussa Gama amewaomba wakulima kuchangamkia mbegu  za ufuta na alizeti  zinazotolewa bure  na Halmashauri  kupitia Idara ya kilimo

Mkurugenzi Mtendaji ndugu Mussa Gama akitoa majibu kwa madiwani

Amesema kuwa Halmashauri ya Tandahimba inatarajia kuwekeza viwanda vidogo vitatu  vya kukamua mafuta ya alizeti katika Tarafa tatu ya Litehu,Namikupa na Mahuta ambapo zinatasaidia mkulima kuuza  zao hilo kwa urahisi

Wakuu wa Idara na vitengo walioshiriki kwenye kikao cha baraza la madiwani

Ameyasema hayo  kwenye kikao cha kawaida cha baraza la madiwani baada ya kusoma taarifa yake na Mhe.Hamza Balakali Diwani wa kata ya kwanyama kuhoji uhakika wa  soko kwa wakulima ambao zao la alizeti katika Wilaya yao ni jipya kibiashara

Waheshimiwa madiwani wakiwa kwenye kikao katika ukumbi wa mikutano

“Halmashauri tunaendelea kusambaza mbegu za alizeti kilo 300 na ufuta kilo 3000,niwaombe madiwani wahimizeni wananchi kulima na mazao mbadala ya kibiashara kama alizeti na ufuta,Halmashauri tunatarajia kuwekeza viwanda vidogo  vitatu vya kukamua mafuta ya alizeti kwaiyo soko litakuwepo hapa hapa Tandahimba,”amesema Mkurugenzi

Aidha akitoa muelekeo wa  bei za viuatilifu katika maandalizi ya msimu ujao amesema utaratibu ambao umeandaliwa ni mkulima kuchangia asilimia 50 ya bei ya sokoni na serikali asilimia 50 ambapo utaratibu utaratibiwa na  chama kikuu kwa kushirikiana na vyama vya msingi

Naye Mkuu wa Wilaya ya Tandahimba Mhe. Kanali Patrick Sawala amewasistiza madiwani kuhakikisha katika maeneo yao wananfunzi waliochaguliwa kidato cha kwanza wanakwenda shule lakini pia wananfunzi wanaotakiwa kuanza darasa la kwanza na awali wanapelekwa shule kwa wakati

Mkuu wa Wilaya ya Tandahimba Mhe.Kanali Patrick Sawala akisistiza jambo kwa madiwani

“Sioni sababu ya wanafunzi hadi leo kutoripoti shuleni,nawaomba madiwani mkalisimamie hili katika maeneo yenu,mwanafunzi ambaye hataripoti shule hatua kali tutamchukulia mzazi wake,katika hili tutakua wakali kwasababu Mhe.Rais amejenga miundombinu mizuri,hata kama mwanafunzi hana sare za shule aripoti shule mengine yatafuata,”amesema Dc Sawala

Waheshimiwa madiwani wa Halmashauri ya Wilaya ya Tandahimba

Katika kikao hicho cha siku mbili madiwani waliweza kuwasilisha taarifa zao za maendeleo ya  kwenye kata zao sambamba na kumshukuru Mhe.Samia Suluhu Hassan kwa ujenzi wa vyumba 88 vya madarasa ambavyo vimewezesha wanafunzi wote waliochagulia kuingia madarasani kwa wakati mmoja

Madiwani wakiwasilisha taarifa za kamati