VIONGOZI NA WANACHI WA MTWARA WASHUHUDIA UTIAJI SAINI MKATABA WA UJENZI WA BARABARA KM 160

Posted on: June 21st, 2023

Na Kitengo cha Mawasiliano

Viongozi na Wananchi wa Mkoa wa Mtwara wameshuhudia utiaji  saini wa Mkataba wa Ujenzi wa Barabara ya Mnivata hadi Masasi Km160 itakayojengwa  kwa kiwango cha lami ambapo kiasi cha Shilingi Bilioni 234.5 zitatumika kutekeleza mradi huo ambao utakamilika Mwaka 2025

Hafla  ya utiaji saini wa Mkataba huo umefanyika  Juni 21,2023 katika uwanja wa Sabasaba Halmashauri ya Mji Newala ambapo mgeni rasmi  alikuwa ni Waziri wa Ujenzi na Uchukuzi Prof.Makame Mbarawa

Ujenzi wa barabara hiyo utatekelezwa na Makampuni mawili ambapo Km 100 zitajengwa na Kampuni ya China Wi Yi ambayo itaanzia Mnivata hadi Mitesa kwa thamani ya shilingi Bilioni 141.9 na Km 60 zitajengwa na Kampuni ya China Communication Construction ambayo itaanzia Mitesa hadi Masasi Mjini kwa thamani ya shilingi Bilioni 92.5

Aidha Ujenzi wa Barabara ya Mnivata,Nanyamba, Tandahimba, Newala na Masasi  kwa kiwango cha lami itafungua fursa ya kiuchumi kwa wananchi wa  Mtwara  ambao wameipongeza Serikali kwa kutatua kero yao ya barabara hiyo

Kwa upande wao wabunge wa Mkoa wa Mtwara ambao  walihudhuria hafla hiyo wameipongeza Serikali ya awamu ya sita inayoongozwa na Mhe.Dkt Samia Suluhu Hassan Rais wa Jamhuri ya Muungano wa Tanzania kwa kuendelea kuwakumbuka watu wa Mtwara