Serikali itaendelea kuwawezesha wanawake kiuchumi

Posted on: March 8th, 2023

Na Kitengo cha Mawasiliano

Mkuu wa Mkoa wa Mtwara Mhe.Kanali Ahmed Abbas Ahmed amesema Serikali itaendelea kuwawezesha wanawake kiuchumi kwa kutambua na kuthamini mchango wao katika ukuaji wa Uchumi

Amesema katika fedha zinazotolewa na Halmashauri kwa makundi maalum ya Vijana, Wanawake na watu wenye Ulemavu ambapo mwaka wa fedha 2021/2022 na Disemba 2022/2023 Halmashauri za Mkoa wa Mtwara kutokana na fedha za mapato ya ndani zimekopesha kiasi cha shilingi  Bil 3.3 kwa vikundi 632 vikiwemo  vya wanawake

RC amesema katika fedha hizo  shilingi Bil 1.7 zimetokana na  makusanyo ya makundi husika,shilingi Bil 1.6 zimetokana na marejesho ,Shilingi Bil 1.6 zimekopeshwa kwa vikundi  356 vya wanawake na vijana,Shilingi Bil.1.3 vikundi 177 vya watu wenye ulemavu na shilingi  Mil 345 kwa vikundi 145

Aidha kwa mwaka wa fedha 2023/2024 Halmashauri za Mkoa wa Mtwara zimeweka makadirio ya kukopesha  kiasi cha shilingi Bil.2.4 kwa ajili ya mikopo ya vikundi vya wanawake,vijana na watu wenye ulemavu ambapo ametoa wito kurejesha mikopo hiyo kwa wakati sambamba na wanawake  kuchangamkia fursa hiyo ili kujikwamua kiuchumi

Amesema hayo Machi 8,2023 katika kilele cha maadhimisho ya siku ya wanawake Duniani yenye kauli mbiu “Ubunifu na Mabadiliko ya Teknolojia chachu katika kuleta Usawa wa Kijinsia” ambapo Kimkoa yamefanyika katika viwanja vya shule ya msingi Amani Halmasahauri ya Wilaya yaTandahimba na kutaka jamii kutathimini na kutafakari kwa pamoja  jinsi Mkoa ulivyopiga hatua

“Nachukua fursa hii kuhimiza wewe mjasiriamali kujenga hamasa binafsi ya kujifunza maarifa mapya yatakayokusaidia kuwa mbunifu katika biashara yako,nawapongeza wanawake wajasiriamali ambao mmejitokeza kuonesha bidhaa zenu ,taasisi zote na wananchi mlioshiriki katika siku hii ya wanawake ambayo imefana sana,”amesema RC

Kwa upande wa viongozi mbalimbali waliopata nafasi ya kuzungumza wamesistiza wanawake kupinga vitendo vya ukatili wa kijinsia na kutoa taarifa za ukatili unaofanyika katika jamii ili vyombo husika  viweze kuchukua hatua za kisheria kwa wahusika