Pikipiki 32 zakabidhiwa kwa watendaji kata kuongeza kasi ya ukusanyaji mapato

Posted on: February 10th, 2022

Na Kitengo cha Habari na Mawasiliano

Watendaji kata Halmashauri ya Wilaya ya Tandahimba wametakiwa kuongeza kasi katika ukusanyaji wa  mapato ya ndani  baada ya kukabidhiwa pikipiki 32 zenye thamani ya zaidi ya shilingi Mil.83  fedha ambazo zimetokana na mapato ya ndani

Mwenyekiti  Mhe.Baisa Baisa akimkabidhi pikipiki  katibu wa watendaji ndugu Sudi Sudi

Akikabidhi pikipiki hizo 32 kwa watendaji kata  zote Mwenyekiti wa Halmashauri ya Wilaya ya Tandahimba Mhe.Baisa Baisa  ameeleza kuwa fedha zilizotumika kununulia pikipiki hizo zimetokana na mapato ya ndani lakini ziliwekwa kwenye bajeti ya  kununua gari ya Mkurugenzi

Amesema kuwa Mkurugenzi baada ya kuona changamoto iliyopo katika ukusanyaji wa mapato akaridhia fedha hiyo isinunuliwe gari badala yake itumike kuwanunulia vyombo vya usafiri watendaji kata ili ziwasaidie katika ukusanyaji wa mapato

“Nampongeza Mkurugenzi kwa kuridhia na madiwani naamini pikipiki hizi zinakwenda kuleta matokeo mazuri katika ukusanyaji wa mapato ndani ya Wilaya yetu,hatutarajii kusikia tena changamoto ya usafiri kutoka eneo moja kwenda jingine kukusanya mapato,mkazitunze kwakuwa  ni mali ya uma,”amesema Mwenyekiti

Naye Mkurugenzi Mtendaji wa Halmashauri ya Wilaya ya Tandahimba ndugu Mussa Gama amesema kuwa pikpiki hizo zitawarahisishia watendaji kata kutekeleza majukumu yao ipasavyo hussan ya ukusanyaji mapato ambayo ni lengo kuu

Mkurugenzi Mtendaji ndugu Mussa Gama akiwasha moja ya pikpiki hizo kwa ajili ya majaribio

“Fedha hizi zilitakiwa zinunue gari,lakini nikaona kuwa tuboreshe ukusanyaji wa mapato,watendaji ndiyo wanahusika wa zoezi hilo katika maeneo yao,nikaridhia na nikawashawishi madiwani pia tubadili matumizi haya ili tuongeze mapato ya Halmashauri yetu,lakini pia pikipiki hizi zitawasaidia kufika kwa wakati katika vikao mbalimbali ambavyo wanahitajika Wilayani,kwasababu wengi walikuwa wanachelewa kutokana na changamoto ya usafiri,”amesema Mkurugenzi

Aidha nao watendaji kata ambao leo wamekabidhiwa pikipiki hizo wameushukuru Uongozi wa Halmashauri  lakini pia wamesema  usafiri kutoka eneo moja kwenda lingine ilikuwa ni changamoto katika kutekeleza majukumu yao