NMB TAWI LA TANDAHIMBA YAKABIDHI MADAWATI ,STULI NA MABATI KWA SEKTA YA ELIMU

Posted on: November 7th, 2023

Na Kitengo cha Mawasiliano 

Mkuu wa Wilaya ya  Tandahimba Mhe.Kanali Patrick Sawala amepokea mabati  369,madawaati 390 na stuli za maabara 100 zote zikiwa na thamani ya Tsh Milioni 63.9 kutoka  Benki ya NMB tawi la Tandahimba ikiwa ni mchango wao kwa sekta ya elimu kuunga juhudi za Serikali katika sekta hiyo.

Akizungumza Novemba 7,2023  kwenye Hafla fupi ya makabidhiano ya vifaa hivyo yaliyofanyika katika ukumbi wa mikutano wa Halmashauri na kuhudhuriwa na Wakuu wa Idara na watumishi Dc Sawala ameipongeza  benki ya NMB kwa  vifaa hivyo ambapo amesema vitasaidia katika ujifunzaji na ufundishaji katika shule hizo.

" Nawapongeza sana Benki ya Nmb kwa mchango huu wa madawati,mabati na stuli za maabara ambazo zinakwenda kupunguza uhaba kwenye  shule  zetu,wito kwa taasisi nyingine kuiga mfano wa NMB wa kurudisha kwa jamii,ili kuendelea kuunga juhudi za Serikali katika Sekta ya Elimu" amesema Dc Sawala.

Kwa upande wake Meneja wa Benki ya NMB  Kanda ya Kusini Ndg.Faraja Ng'ingo akikabidhi vifaa hivyo amesema kuwa benki hiyo imekuwa na utaratibu wa kurudisha faida ya asilimia 1 wanayoipata kwa jamii ambapo wanachangia katika sekta ya Elimu na Afya kama sehemu ya uwajibikaji kwa jamii inayowazunguka.

" Tunatambua juhudi  za Serikali ya awamu ya sita ya kusimamia upatikanaji wa Elimu bora kwa nguvu zote,hatuna budi kuipongeza Serikali kwa hilo na sisi kama wadau tunao wajibu wa kuunga mkono juhudi hizi za Maendeleo kwani jamii imeifanya Benki ya NMB kuwa hapa tulipo," amesema Meneja wa Kanda