MWENYEKITI WA CCM TANDAHIMBA AWATAKA WANAFUNZI KUZINGATIA MASOMO

Posted on: October 4th, 2023

Na Kitengo cha Mawasiliano. 

Mwenyekiti wa Chama Cha Mapinduzi (CCM) Wilaya ya Tandahimba Mhe.Ismaili Mkadimba amewataka wanafunzi kuzingatia masomo ili wafikie malengo waliyojiwekea.

Ameyasema hayo wakati akizungumza na wanafunzi wa Shule ya Sekondari  Namikupa Oktoba 4,2023  mara baada ya Wajumbe wa Kamati ya Siasa ya CCM Wilaya ya Tandahimba ikiongozwa na Mwenyekiti Mhe.Ismaili Mkadimba kukagua mradi wa ujenzi wa bweni la Wasichana Shule ya Sekondari  Namikupa

"Zingatieni masomo ili muweze kufikia malengo yenu,Serikali ya Awamu ya Sita imeboresha Miundombinu  ya Elimu ili msome kwenye mazingira  bora, jukumu lenu wanafunzi ni kuongeza bidii kwenye masomo,msijiingize kwenye mambo mengine ambayo yatawakatishia masomo yenu," amesema Mhe.Mkadimba.

Aidha,amepongeza miradi iliyokamilika na kusistiza ianze kutoa huduma kwa wananchi lakini pia ameagiza miradi ambayo bado isimamiwe iweze kukamilika kwa wakati ili wananchi waweze kupata huduma.

Kwa upande wake Mkuu wa Wilaya ya Tandahimba Mhe.Kanali Patrick Sawala amesema maelekezo yaliyotolewa na Kamati ya Siasa ya CCM atayasimamia ili yatekelezwe kwa wakati na wananchi wa Tandahimba waendelee kupata Maendeleo.

Wajumbe wa Kamati ya Siasa Wilaya ya Tandahimba wamehitimisha ziara yao ya siku mbili Oktoba 4,2023 ambapo wametembelea na kukagua Jumla ya miradi yenye thamani ya zaidi ya Tsh.Bilioni 7.5