MNUFAIKA WA TASAF TANDAHIMBA AELEZA ALIVYOJIKWAMUA KIUCHUMI, AISHUKURU SERIKALI.

Posted on: June 16th, 2024

Mratibu wa TASAF Judith  Mzava pamoja na Afisa Ufuatiliaji  TASAF  Wilaya ya Tandahimba Rahel Kyomo wamemtembelea Mlengwa  Mfuko wa Maendeleo ya Jamii (TASAF) ambae amekuwa akinufaika na fedha zinazotolewa na Serikali kupitia Mfuko huo.

Akizungumza nyumbani kwake Leo Bi.Amina  Chihonde Mkazi wa Kijiji Cha Namdowola Kata ya  Nanyanga Wilayani Tandahimba amesema kabla ya kupata fedha za TASAF alikuwa na maisha duni.

" Mimi maisha yangu yalikuwa magumu sana, sikuwa na  kitu chochote cha kunipatia kipato, lakini baada ya kupata fedha za  TASAF sasa naweza kuwasomesha wajukuu zangu, na kuitunza familia yangu vizuri, pia kupitia Fedha za TASAF nimeweka akiba na  nimeweza kununua Ng'ombe watatu wa Maziwa ambapo nauza maziwa na kuongeza kipato Cha Familia yangu" Bi Amina.

Kwa Upande wake Afisa Ufuatiliaji TASAF Wilaya ya Tandahimba Rachel Kyomo  amesema Serikali inaendelea kutoa fedha nyingi kwa ajili ya Kunusuru kaya maskini akionya baadhi ya Walengwa  kuzitumia vyema ili ziwasaidie.

Aidha, Mkuu wa Kitengo Cha TASAF Wilaya ya Tandahimba Judith  Mzava amesema wanaendelea kufatilia wanufaika  kwa kuelimishwa  kujiunga na njia za malipo kwa njia ya simu, kwa mitandao  ya Vodacom, Airtel, Halopesa, Tigo pesa,  na  taasisi za fedha za Benk za NMB na CRDB na kutoa Elimu ya namna ya kuzitumia fedha hizo ili ziwasaidie kujikwamua kiuchumi na kuongeza kipato.

Katika Mwaka wa Fedha 2023/2024 Serikali imetoa Tshs. Bilioni 1.16  kwa kaya maskini 5,859 katika vijiji 157 vya Wilaya ya Tandahimba.