MFUMO WA UTOAJI MREJESHO KWA MTEJA UTABORESHA HUDUMA YA MAMA NA MWANA NA KULETA UFANISI KWA WATOA HUDUMA ZA AFYA" MKUTI.

Posted on: February 23rd, 2024

Na Kitengo cha Mawasiliano. 

Mwakilishi wa Mkuu wa Wilaya ya Tandahimba Ndg.Francis Mkuti amewataka washiriki  wa mafunzo ya Mfumo wa kidigitali wa ukusanyaji wa maoni ya Mama na Mwana kuzingatia mafunzo hayo ili kuboresha huduma  za mama wajawazito na watoto wenye siku 28 katika Halmashauri ya Wilaya ya Tandahimba.

Akifungua mafunzo ya siku moja leo Februari 23,2024 kwenye ukumbi wa Mikutano wa Halmashauri ambapo washiriki ni Watoa huduma za afya ,Watendaji wa Vijiji na wahudumu wa afya ngazi ya jamii (WAJA) amesema kuwa mfumo wa utoaji mrejesho utaongeza ufanisi kwa wataalamu na kujitathimini.

" Mkazingatie mafunzo haya ili kufanikisha na kuleta matokeo mazuri ya Serikali ya kuboresha huduma kwa Mama na Mwana kwenye Halmashauri yetu,lakini mfumo huu utawezesha wataalamu kila mmoja kwenye eneo lake kujitathimini na kuwa na takwimu sahihi za mama wajawazito na watoto wa mwezi mmoja ," amesema Mkuti

Kwa upande wake Mwezeshaji Dkt..Makarioss Makarioss amesema mafunzo hayo  yanalenga  kuboresha huduma za mama na watoto wachanga ili kuhakikisha wakina mama wanapokwenda kupata huduma za kliniki wanatoa maoni ya huduma walizopata ambayo yatarudisha mrejesho kwa watoa huduma na kituo husika.

" Mama Mjawazito akifika kliniki ataelekezwa jinsi ya kutumia mfumo huu kwa kutumia simu yoyote ambapo atajisajili na kuaandika neno Mama  kwenda namba 15077 buree na atakuwa anaulizwa huduma alizofanyiwa katika kituo alichohudhuria,mfumo huu hautaonesha jina wala namba  yake,itaonesha maoni yake,hapo awali mfumo uliokuwa unatumika ni sanduku  la maoni lakini ilikuwa ni naira kukuta maoni," amesema Mwezeshaji

Naye Kaimu Mkurugenzi Mtendaji Halmashauri ya Wilaya ya Tandahimba  Mwl.Sostheness Luhende amesema washiriki wahakikishe  mafunzo hayo yataleta maboresho katika  huduma ya mama na Mwana kwenye Halmashauri ya Wilaya ya Tandahimba na kupunguza Vifo vya mama na mtoto.