Madiwani Tandahimba waicharukia Tarura

Posted on: April 23rd, 2020

Na. Kitengo cha Habari na mawasiliano 

Baraza la madiwani  Halmashauri ya Tandahimba   wameiomba  serikali kupitia Wakala wa barabara vijijini na mijini (Tarura) kufanya maboresho ya barabara  kwa kuzichonga hususani maeneo ya vijijini  ambayo kwa sasa  hayafikiki kutokana na ubovu wa miundombinu hiyo

Akielezea changamoto ya barabara Diwani  wa kata ya Mihuta  Hamisi Mfaume amesema kuwa miaka  iliyopita  barabara hizo zilikuwa zinapitika ndani ya vijiji lakini kwa sasa barabara nyingi za ndani ya Wilaya zimejifunga na kuwapa tabu wananchi kutoka sehemu moja kwenda nyingine

“Tunawaomba Tarura walichukulie suala  la barabara  vijijini kama dharura hususan wakati huu wa ugonjwa wa corona (Covid – 19)  barabara zimejifunga tunapata tabu kupata huduma mbalimbali  ,”amesema Mfaume

Amesema awali Halmashauri ilikuwa inajitahidi kuzichonga barabara hizo  na kuwawezesha wananchi kuendelea na shughuli zao za maendeleo  lakini kwa sasa barabara hizo  zimeharibika hata upitaji  wa gari na pikipiki ni mgumu

“Wakati barabara hizi zipo chini ya Halmashauri zilikuwa zinapitika na zikiharibika walikuwa wajitahidi kuzichonga lakini kwa sasa Tandahimba ipo  kwenye kisiwa kutokana na ubovu wa barabara ”,amesema Mfaume

Naye Mhandisi wa Tarura Wilaya Paulo Mliya akijibu hoja za madiwani amesema wanayajua maeneo yote mabovu hivyo watayashughulia mara baada ya kupata  fedha 

“Tunayajua  maeneo ambayo hayapikiti kama vile Kata ya Mdimba na Chingungwe tutayashughulikia  kwa sasa mtuvumilie,”amesema Mliya