MAAFISA UGANI KILIMO WALIOAJIRIWA NA BODI YA KOROSHO (CBT) WAPEWA MAFUNZO TANDAHIMBA.

Posted on: January 13th, 2025

Maafisa Ugani kilimo 51 walioajiriwa na Bodi ya Korosho Tanzania (CBT)  wamepewa mafunzo ya kuwajengea uwezo ili kwenda kutekeleza majukumu yao kwa ufanisi katika Kata walizopangiwa Halmashauri ya Wilaya ya Tandahimba .

Akisoma taarifa ya  ufunguzi wa mafunzo hayo leo Januari 13,2025 Mwakilishi wa Mkuu wa  Wilaya ya Tandahimba Ndg.Francis Mkuti amewataka maafisa ugani hao ambao watakwenda kwenye Kata zote za Halmashauri ya Wilaya ya Tandahimba kuzingatia mafunzo hayo ili kwenda kuongeza uzalishaji wa zao la korosho .

" Napenda kuwapongeza Bodi ya Korosho  Tanzania kwa usimamizi mzuri wa korosho kwa ongezeko la uzalishaji ambapo msimu huu wa mwaka  2024/2025  tumeshuhudia ongezeko kutoka Tani 310,787  mwaka 2023/2024  hadi kufikia Tani 410,000  mwaka 2024/2025 hivyo maafisa ugani hawa watakuwa chachu ya kuongeza uzalishaji lakini pia mkatumie nafasi mliyopata kuonesha uzalendo wenu kwa wakulima wetu kwa kufanya kazi kwa  juhudi kubwa pia mtaongeza ujuI na kupata uzoefu  wa  ufikishaji wa huduma za ugani kwa wakulima ili wazalishe kwa tija mazaonwanayolima likiwemo Korosho,"

Kwa upande wake Afisa Kilimo wa bodi ya korosho Ndg.Johnson Kaaya amesema  mafunzo rejea ya maafisa ugani  hao ni mpango wa kukuza ujuzi kwenye Programu ya Jenga kesho iliyo bora ambapo baada ya kuwajengea uwezo waende wakatekeleze kwa vitendo ili kuongeza uzalishaji wa zao la korosho.

Aidha amesema  mpango wa kuajiri maafisa ugani hao ni kuongeza uzalishaji wa korosho ghafi nchini kufikia Tani 700,000 mwaka 2025/2026 na Tani 1,000,000 ifikapo mwaka 2029/2030. " Maafisa ugani hawa  katika kuhakikisha wanaleta mabadiliko chanya watakabidhiwa vitendea kazi  ambavyo ni pikipiki na vishikwambi ili wakatekeleze shughuli za uendeshaji wa zao la Korosho," amesema Kaaya

Mafunzo hayo ya siku tano  kwa Maafisa Ugani  yatahitimishwa  Januari 17,2025

#Tandahimba tumejipanga kazi zinaendelea