Kiasi cha Mil.213.1 zatumika kwenye malipo ya walengwa 6175 Tandahimba

Posted on: July 20th, 2021

Na Kitengo cha Habari na Mawasiliano

Kiasi cha Shilingi  213,100,000 kimetumika kwenye malipo ya walengwa  6175 wa Mfuko wa Maendeleo ya Jamii (TASAF) Wilaya ya  Tandahimba kati ya walengwa 6225  huku kiasi cha shilingi  1,472,000 kimebaki  baada ya walengwa 50 kutoshiriki kwenye zoezi hilo kwa sababu mbalimbali

Hayo yamebainishwa kwenye taarifa ya  tathimini ya zoezi la malipo na Mratibu wa TASAF Wilaya ya Tandahimba Ismaely Mbilinyi ambapo amesema  malipo ya mwezi wa 3 na 4 yamefanyika kwa siku tano mwanzoni mwa mwezi Julai mwaka huu katika maeneo husika

Malipo hayo yamefanyika kwa  vijiji 88 ambavyo vipo kwenye mpango Wilayani Tandahimba ambapo wawezeshaji wa malipo walizingatia kanuni na sheria katika kuendesha zoezi la malipo kwenye vijiji

“Kaya 50 ambazo hazijashiriki malipo zilikuwa na sababu mbambali  ikiwemo vifo,walengwa kutokuwepo kwenye maeneo yao wakati wa malipo na walengwa wengine wamefuzu na kujiondoa kwenye mpango,lakini kwa ujumla zoezi limemalizika vizuri”amesema Mratibu

Aidha amesema kuwa miongoni mwa changamoto ambazo zimejitokeza katika zoezi hilo ni pamoja na  baadhi ya walengwa kutokuwa na vitambulisho  na walengwa wengine majina yao kutoonekana katika orodha ya malipo