Halmashauri ya Tandahimba yatoa msaada wa matibabu kwa kijana aliyepata ajali ya gari

Posted on: April 15th, 2020

Mkurugenzi Mtendaji wa Halmashauri ya Tandahimba Said Msomoka

Na Kitengo cha Habari na Mawasiliano

Mkurugenzi Mtendaji wa Halmashauri ya Tandahimba  Said Msomoka ametoa msaada wa matibabu kwa kijana Said Abdallah  ambaye alipata ajali iliyosababisha kuvunjika kwa miguu miwili na mkono  lakini kwa muda wa miezi miwili hakupata huduma stahiki kwa kukosa fedha za matibabu

Akizungumza ofisini kwake  Msomoka amesema kuwa amechukua hatua hiyo baada ya Mwenyekiti wa  Kitongoji chaTandahimba mjini Ashura Madata kutoa taarifa za uwepo wa kijana huyo katika kitongoji chake

Kijana Said Nyecha (29) ambaye aligongwa na gari miezi miwili iliyopita

Amesema kuwa  Halmashauri imeamua kumuhudumia  kijana huyo  ili aweze kupata matibabu stahiki kwakuwa kidonda hicho hakijapata huduma kwa muda  hivyo ameamua  kuchukua hatua ya kumpeleka Hospitali ya Wilaya kwa hatua za awali  na baadaye atampelekwa  Hospitali ya Nyangao

“Tumechukua hatua ya kumkatia bima ya ICHF ili aweze kupata huduma nafuu kwakuwa   mzazi  wakeambaye ni (mama) kutokuwa na uwezo wa kumudu gharama zake,kwaiyo walipewa matibabu nusu kule Hospitali ya Nyangao sisi tutamalizia fedha yote inayodaiwa hospitali na tutawapa fedha zingine za kuendelea na matibabu sambamba na  chakula chake kwa kipindi atakachokuwa hospital,”amesema Msomoka

Naye mama yake Halima Ally amesema kijana wake amegongwa na gari kuanzia mwezi wa pili mwaka huu  na gari lilikimbia kwaiyo alipelekwa hospitali kutokana na kukosa fedha hakuweza kupata matibabu mazuri na hivyo kurudi nyumbani 

Mratibu wa mfuko wa  afya ulioboreshwa (ICHF) Violeth Mahembe akiwakabidhi bima ambayo atapata matibabu bure mgonjwa na mama yake ambayo imelipiwa na Halmashauri

“Naishukuru Halmashauri kwa kumpatia Bima itakayomuwezesha kupata huduma , Mkurugenzi  ameridhia kutulipia deni katika Hospitali ya Nyangao ambayo tunadaiwa,kijana wangu amekuwa akiteseka  kwa maumivu makali kwakutopata huduma kwa miezi yote miwili,tunaishukuru serikali kwa msaada huu,”amesema Ally.

Hata hivyo mwenyekiti wa kitongoji Ashura Madata ameeleza kuwa hatua hiyo inaonyesha  serikali ipo karibu na wananchi wake  kwa kuwasaidia pale ambapo wameshindwa kwa kutambua nguvu ya nchi ni vijana

Afisa ustawi wa jamii Gift Limbanga (kushoto)akimkabidhi kwa niaba ya Mkurugenzi fedha taslimu shilingi laki tano kwa ajili ya kuanzia matibabu (kulia) mwenyekiti wa kitongoji cha Tandahimba Ashura Madata

“Huyu kijana ameteseka,vidonda havikuwa vinasafishwa,mkono umevunjika hajafanyiwa chochote na miguu yote miwili  imevunjika kwakuwa uwezo wa mama  yake ni mdogo  alikuwa anakaa naye nyumbani tu,lakini leo tumepata msaada huu tunaishukuru sana halmashauri yetu kwakuwa Mkurugenzi ametoa gari ili aweze kwenda hospitali ya Wilaya kwa ajili ya kusafisha na baadaye atapelekwa hospital ya Nyangao,”amesema Madata