Halmashauri 184 Nchini kunufaika na mradi wa BOOST

Posted on: December 23rd, 2022

Na Kitengo cha Mawasiliano

Halmashauri 184 za Tanzania bara  zitanufaika na mradi wa BOOST katika kuboresha Elimu  ya Awali na Msingi kwa kujenga miundombinu ya madarasa na matundu ya vyoo ambapo mradi  huo utatekelezwa kwa kipindi cha miaka mitano

Akizungumza na washiriki wa mafunzo ya siku mbili  ya kujengewa uelewa wa kusimamia miradi hiyo ya BOOST  Afisa Elimu  Mkoa wa Mtwara  Mwl. Kiduma Mageni amesema mafunzo hayo ni muhimu ili kutekeleza miradi hiyo katika viwango vya ubora na muda unaotakiwa

Mafunzo hayo yamefanyika Disemba 22- 23,2022 katika ukumbi wa Chuo Kikuu cha Ualimu Kawaida Manispaa ya Mtwara Mikindani na kujumuisha Halmashauri zote za Mkoa wa Lindi na Mtwara

Aidha Mwl Mageni ameeleza kuwa BOOST  ni mpango  wa kuboresha upatikanaji  wa fursa sawa katika ujifunzaji bora wa Elimu Msingi hivyo washiriki ni muhimu kusimamia  miradi hiyo ili iweze kuleta manufaa kwa Halmashauri husika

Naye Mkurugenzi wa Usimamizi wa Elimu TAMISEMI Ndg.Vicent Kayombo amewapongeza  washiriki  kwa kupata mafunzo hayo na kuwasistiza kuendelea kuhamasisha  wazazi na walezi kuwaandikisha watoto wote wenye sifa  ya kuanza Elimu ya Awali na Msingi

Mradi wa Boost ni sehemu ya mpango wa Lipa kutokana  na matokeo katika Elimu EP4R II ambao umelenga kutekeleza afua nane  muhimu kwa muda wa miaka mitano ambapo kiasi cha shilingi  trilioni 1.15 zitatumika  katika utekelezaji wa mradi wa BOOST kwa kujenga vyumba vya madarasa Elfu kumi na mbili (12000) na matundu ya vyoo katika shule elfu kumi na saba mia moja themanini na mbili (17182) katika Halmashauri zote 184