DC Waryuba: Watendaji wa Mahakama watakiwa kufanya kazi kwa kufuata maadili

Posted on: February 6th, 2020

Pichani: Watumishi wa Mahakama wilayani Tandahimba wakiwa katika picha ya pamoja kwenye kilele cha siku ya sheria

Na Kitengo cha Habari na Mawasiliano

Mkuu wa Wilaya ya Tandahimba Mhe. Sebastan Waryuba amewataka watendaji wa mahakama  wafuate maadili ya kazi zao ili kuwezesha shughuli za mahakama  kuendeshwa bila viashiria vya rushwa.

Akizungumza siku ya Kilele cha maadhimisho  ya Sheria   ambayo  yamefanyika leo katika viwanja vya  Mahakama ya wilaya ya Tandahimba  alieleza kuwa  watendaji hao wasitoe  nafasi kwa wananchi kuwaona ni kikwazo katika kesi zao.

“Watendaji fanyeni kazi kwa uadilifu   ili kuepuka mianya ya rushwa, kwa kufanya hivyo mtakuwa mnajenga Imani kubwa  kati ya wananchi  na ninyi hususani makarani”,alisema Waryuba

Aidha amewaomba wawekezaji  kuja kuwekeza katika Wilaya ya Tandahimba  kwakuwa maeneo yapo  mazuri kwa uwekezaji wa kibiashara kama kauli mbiu ya siku ya sheria inavyohamasisha uwekezaji.

Naye Hakimu Mkazi Mfawidhi Wilaya ya Tandahimba  Mhe. Joseph Waruku alieleza kuwa mabadiliko ya sera ya mara kwa mara huwa hayawavutii  wawekezaji  na hivyo kushindwa kuwekeza katika sekta mbalimbali hususan viwanda.

“Sera zinavyobadilika badilika  huwa haziwavutii wawekezaji  na kuona kuwa kama ni kikwazo kwa upande wao ,lakini  sisi kama mahakama  tupo katika kipindi cha maboresho  ya huduma zetu,”alisema  Hakimu Waruku

Hata hivyo Mwenyekiti wa Mawakili wa Kujitegemea Wilaya ya Tandahimba Abdallah  Makongoro  alibainisha kuwa  uwepo wao katika Mahakama kunawezesha  wananchi kupata huduma  kwa wakati hali inayopelekea kuleta faraja kwa wananchi.

Mamia ya Wananchi wilayani Tandahimba wakimsikiliza kwa makini Mkuu wa wilaya ya Tandahimba (Pichani hayupo)