Dc Waryuba awataka maafisa ugani wa vijiji na kata kuwa na mashamba ya mfano

Posted on: January 6th, 2021

Na Kitengo cha Habari na Mawasiliano

Mkuu wa Wilaya ya Tandahimba Sebastian Waryuba amewataka maafisa ugani kuwa karibu na wakulima katika maeneo yao kwa kuwapa ushauri wa kilimo ili kuongeza uzalishaji wa zao la korosho na mazao mengine ya chakula

Ameyasema hayo wakati akifungua mkutano wa maafisa ugani wa  Vijiji na Kata jana katika ukumbi wa mikutano,amesema pamoja na kutoa ushauri maafisa ugani katika maeneo yao wanapaswa kuwa na mashamba ya mfano ili wakulima wajifunze kutoka kwao

Maafisa Ugani wa kata na vijiji  kwenye mkutano  wa kupanga mikakati ya kuleta mapinduzi ya uzalishaji

Amesema  kuwa  ili kuweza kuongeza uzalishaji ni jukumu la maafisa ugani  kuhamasisha wakulima kutibua mashamba ya korosho ili maji yaweze kuingia kwenye ardhi  sambasamba na kuondoa mikorosho iliyozeeka kwa kusimamia ukataji wa kitaalam

Dc Waryuba akiwasistizia maafisa ugani kusimamia kampeni ya ondoa mapori ongeza uzalishaji

“Mikorosho inahitaji maji ya kutosha wahamasisheni wakulima watibue mashamba yao ili maji yaweze kuingia kwa wingi katika mikorosho ili tuongeze uzalishaji na hiki kipindi cha mvua tusisahau mazao mengine wananchi walime mazao ya chakula,hatutaki njaa katika Wilaya yetu,”amesema Dc Waryuba

Mkurugenzi Mtendaji ndg Said Msomoka (kati) akiwa na Mweka hazina   Ally Machela(kushoto) na Afisa Kilimo  Issa  Naumanga kwenye Mkutano  na maafisa Ugani wa kata na vijiji

Naye Mkurugenzi Mtendaji  wa Halmashauri ya Wilaya ya Tandahimba ndugu Said Msomoka amesema kampeni ya ondoa mapori ongeza uzalishaji italeta mapinduzi katika Halmashauri kwakuwa wakulima wapo tayari kuondoa mikorosho iliyozeeka

Mkurugenzi Mtendaji ndg Said Msomoka akieleza jambo kwa maafisa  ugani

“Hii kampeni  italeta mapinduzi makubwa katika uzalishaji lakini maafisa ugani  wakulima wanawategemea kitaalam nendeni mashambani walipo  ili turudi tulipo kiuzalishaji naamini tunaweza tukisimama kila mmoja sehemu yake,”amesema Mkurugenzi