DC Waryuba akamata robo ekari ya shamba la bangi kijiji cha Chaume

Posted on: April 1st, 2020

Shamba la mmea aina ya bangi robo ekari ambayo limekamatwa kijiji cha Chaume

Na Kitengo cha Habari na Mawasiliano 

Mkuu wa Wilaya ya Tandahimba Sebastian Waryuba ameagiza kung`olewa  robo ekari ya mmea aina ya bangi ambayo ameipanda shambani  kwake mkazi wa kijiji cha Chaume Said Abdalla (41) na Shahame Saidi (25)

Waryuba amesema mkazi huyo amepanda mmea huo wa bangi kwenye shamba  lake ambalo amechanganya na mazao mengine kama vile choroko na  mahindi kitendo ambacho ni kinyume na sheria na taratibu  za nchi

Mkuu wa Wilaya akionyesha mmea huo kwa baadhi ya wananchi waliojitokeza mahali hapo

“Tunashukuru Jeshi la polisi kwa jitihada zao kwa kushirikiana na wananchi  kwa kufanikisha kukamatwa kwa huyu mkulima,  Upandaji na utumiaji wa bangi ni kosa la jinai hivyo mmea huu nimeagiza utolewe na tayari zoezi la ung`oaji limeaza na wakazi hawa watachukuliwa  sheria inayostahili ili iwe fundisho kwa wengine ,”amesema Waryuba

Aidha amewataka wananchi  kupanda mazao ambayo ni halali   katika jamii badala ya kujiingiza katika upandaji wa mimea ambayo itakuwa na madhara kwa vijana na  kupoteza nguvu kazi ya Taifa

Baadhi ya wajumbe wa kamati ya ulinzi na usalama wakiwawekea mzigo wao wa bangi tayari kwa kuibeba

Naye Mkazi huyo Said Abdallah (41) amejitetea kuwa sababu iliyompelekea kupanda zao hilo ni kutokana na ugumu wa maisha na inamuongezea nguvu akiwa anafanya shughuli za shamba

“Mimi sitarudia tena  Mkuu,nilipanda kwasababu ya ugumu wa maisha tuu,na muda mwingine nikinusa majani haya yananisaidia kupata nguvu ya kuendelea na kazi ya kulima,”amesema Abdallah

Mkulima wa shamba hilo wa kijiji  cha Chaume Said Abdallah (41)  akiwa na mwanae Shahame Said(25)