Dc Sawala aridhishwa na maendeleo ya operesheni ya anwani za makazi

Posted on: March 20th, 2022

Na Kitengo cha Habari na Mawasiliano

Mkuu wa Wilaya yaTandahimba Mhe Kanali Patrick Sawala amesema kuwa  anaridhishwa na maendeleo ya operesheni ya Kitaifa ya anwani za makazi ambayo inaendelea ndani ya Wilaya

Ameyasema hayo kwenye ziara yake  inayoendelea katika kata zote 32 zilizopo ndani ya Wilaya  kukagua utekelezaji  wa miradi ya maendeleo na maazimio ya Wilaya na Mkoa  katika sekta ya kilimo,elimu na operesheni ya anwani ya makazi

Dc Sawala katika ziara hiyo  anapokea taarifa na kukagua  hali ya usaili wa wanafunzi wa darasa  la  awali na kidato cha kwanza,hali ya udahili kwa kidato cha kwanza 2022,hali ya chakula  shuleni,mikakati ya  kupandisha ufaulu,uwepo wa mashamba ya mazao ya chakula na  alizeti kila shule,utekelezaji wa miradi katika kata husika na operesheni ya anwani za makazi

“Naridhishwa kabisa na zoezi hili la anwani za makazi ambalo linaendelea ndani ya Wilaya yetu,kila ninapopita naona kazi imefanyika vibao vimewekwa na namba  zimeandikwa kwenye nyumba inanipa faraja sana ,nachukua nafasi hii kuwapongeza viongozi kuanzia wenyeviti wa vitongoji hadi wa kata kwa ushirikiano wenu,natumaini tutakamilisha zoezi hili kwa wakati muafaka,”amesema Dc Sawala

Aidha amesema kuwa hali ya chakula shuleni inaridhisha kuanzia shule ya awali hadi sekondari japokuwa kuna baadhi ya maeneo hawapati wanafunzi wote na ametoa maagizo kuhakikisha wanafunzi wote wanapata chakula shuleni,lakini pia amepongeza shule  kwa kuanzisha mazao ya vyakula na mazao ya biashara katika maeneo yao ambayo yatasaidia wananfunzi kujifunza kazi za kilimo na shule kupata chakula 

“Kuna  mikakati ambayo tuliazimia katika vikao vyetu nafarijika kuwa mnaitekeleza,katika suala la kilimo endeleeni kuwaelimisha wakulima waweze kulimia  mashamba yao ya korosho ili maji yaweze kuingia vizuri  ili kuongeza uzalishaji lakini katika miradi bado inachelewa chelewa hakikisheni inakamilika kwa wakati,”amesema Dc Sawala

Mkuu wa Wilaya ya Tandahimba anaendelea na ziara ya kutembelea kata zote 32 zilizopo Wilaya ya Tandahimba