Abiria watakaoingia Wilaya ya Tandahimba kupimwa Covid – 19 kituo cha mabasi

Posted on: March 24th, 2020

Mkurugenzi Mtendaji wa Halmashauri ya Tandahimba Said Msomoka

Na Kitengo cha Habari na Mawasiliano

Mkurugenzi Mtendaji wa Halmashauri ya Tandahimba Said Msomoka amesema abiria watakaoingia kutoka Dar es salaam na maeneo mengine nje ya Halmashauri  watapimwa katika stendi kuu ya mabasi mara wanavyoingia

Ameyasema hayo jana kwenye majumuisho  ya ziara fupi ya wakuu wa idara  waliotembelea maeneo yaliyotengwa , zahanati ya Mtegu na kituo maalum nje ya hospital kwa ajili ya wagonjwa wa Corona Virus endapo watapatikana ndani ya Wilaya

“Kujikinga ni bora , nasi kama Halmashauri  tumeamua kuchukua hatua ya kupima abiria wanaoingia kutoka Mikoa mingine ikiwa ni hatua ya mojawapo ya kudhibiti maambukizi ya ugonjwa huu kwa wananchi wa Tandahimba,”amesema Msomoka

Amesema mabasi yaendayo Dar es salaam kutoka hapa abiria watanawa mikono wanavyoingia ndani ya gari na yanayoingia pia watanawa na kupimwa joto la mwili mara baada ya kushuka ndani ya basi alilopanda

Aidha amewataka wananchi  kuendelea kuchukua  tahadhari  dhidi ya ugonjwa wa Covid – 19 kwa kunawa maji kila mara  ili kujikinga sambamba na kuepuka misongamano na kusalimiana kwa njia ya kupeana mikono

Naye Kaimu Mganga Mkuu Hospitali ya Wilaya Silas Sembiko amesema vifaa vipo   tayari, maeneo  yametengwa  sambamba na wataalamu wa afya ambao ni maalum kwa ajili ya kushughulia wagonjwa watakaopatikana