DC SAWALA AWASISITIZA WAKUU WA SHULE KUSIMAMIA TAALUMA

Posted on: September 29th, 2023

Na Kitengo cha Mawasiliano 

Mkuu wa Wilaya ya Tandahimba Mhe.Kanali Patrick Sawala amewasistiza  Wakuu wa Shule za Sekondari kusimamia  Taaluma ili kuongeza ufaulu sambamba na kusimamia nidhamu na maadili ya wanafunzi  kujenga Jamii bora .

Amesema hayo leo Septemba 29,2023 kwenye kikao cha Umoja wa  Wakuu wa Shule za Sekondari(TAHOSSA) kutoka Halmashauri zote za Mkoa wa Mtwara kilichofanyika katika Ukumbi wa Mikutano wa Halmashauri.

 " Mkasimamie Taaluma kwenye maeneo yenu ili kuongeza ufaulu wa wanafunzi, lakini pia mkasimamie nidhamu na maadili ya wanafunzi , ili kuendelea kuimarisha mila na desturi  za Kitanzania huku mkiwasistiza kusoma kwa bidii na msisite kutoa taarifa za utoro wa wanafunzi ili hatua za kisheria zichukuliwe kuzuia mdondoko wa wanafunzi ," amesema Dc Sawala.

 Aidha amewasistiza  kusimamia taratibu na miongozo ya utoaji wa  adhabu kwa wanafunzi huku akitoa wito kwa walimu kushirikiana na kuepuka makundi ya wao kwa wao katika maeneo yao ya utendaji ambapo pia amewapongeza kwa kusimamia upatikanaji wa chakula shuleni.

Kwa upande wake Mwenyekiti wa Umoja wa Wakuu wa Shule za Sekondari (TAHOSSA) Mkoa wa Mtwara Mwl.Twaha Chitipu amesema  pamoja na kujadili mambo mbalimbali yanayohusu Umoja wao wa TAHOSSA  lakini pia  wamejadili na kupeana Mikakati ya usimamizi bora wa shule hasa wakilenga kuinua Taaluma na ufaulu

Kikao cha TAHOSSA Mkoa wa Mtwara kimefanyika Halmashauri ya Wilaya ya Tandahimba ambapo Jumla ya Wakuu wa shule za Sekondari 140 kati ya 171 wa Mkoa wa Mtwara wameshiriki katika kikao hicho.