WITO WATOLEWA KWA WAJUMBE WA KAMATI YA AFYA YA MSINGI TANDAHIMBA.

Posted on: February 15th, 2024

Na Kitengo cha Mawasiliano 

Wito umetolewa kwa.Wajumbe wa Kamati ya Afya ya msingi ya Wilaya ya Tandahimba  kutimiza wajibu wao kwenye nafasi zao ili malengo ya Kampeni ya Kitaifa ya utoaji wa chanjo ya Surua Rubella  yatimie.

Akizungumza  leo Februari 14,2024 kwenye kikao  cha Kamati ya afya ya Msingi ya  Wilaya kilichofanyika Ukumbi wa Mikutano wa Mkuu wa Wilaya ,Mwakilishi wa Mkuu wa Wilaya ya Tandahimba Ndg.Francis Mkuti amesema kuwa kila mjumbe akatimize wajibu wake wa kuwajengea uelewa wananchi kuhusu kampeni hii.

Naye Kaimu Mratibu wa Chanjo  wa Halmashauri ya Wilaya ya Tandahimba Bi. Joselyne Kalikawe akitoa wasilisho  kwa Kamati  ya Afya Msingi ya Wilaya ameeleza kuwa ugonjwa wa Surua na Rubella huenezwa kwa njia ya hewa,hivyo chanjo hiyo itasaidia kumkinga  mtoto kuanzia miezi tisa hadi chini ya umri wa Miaka mitano na magonjwa hayo.

Halmashauri ya Wilaya ya Tandahimba imeweka lengo la kutoa chanjo hiyo kwa  watoto  30632  kwenye Kampeni ya Kitaifa ya Chanjo ya Surua Rubella ambayo inaanza rasmi kesho Februari15-18,2024 ambapo huduma  hiyo itatolewa kwenye vituo vyote vya kutolea huduma za afya,shuleni,sokoni na maeneo yaliyotengwa.