Halmashauri ya Tandahimba yatoa eneo kwa ajili ya Ujenzi wa Kiwanda na Ghala

Posted on: April 8th, 2020

Na Kitengo Cha Habari na Mawasiliano

Mkurugenzi Mtendaji wa Halmashauri ya Tandahimba Said Msomoka  ametoa eneo kwa ajili ya Mtandao  wa kijani Kibichi Tanzania (Mkikita) kujenga kiwanda na ghala la kisasa kwa  ajili ya wakulima wa korosho

Akizungumza  ofisini kwake Msomoka amesema kuwa kiwanda  kitakachojengwa kitawasaidia wakulima kuweza  kuuza korosho zao ambazo zimebanguliwa na ambazo bado kwa kuwasogezea huduma

“Tunawakaribisha katika Wilaya  yetu na tunawapa eneo kwa ajili ya kiwanda na ghala kwasababu tunajua kitakuwa msaada mkubwa kwa wakulima wetu,hata hivyo tunawakaribisha wawekezaji waje kuwekeza Tandahimba maeneo yapo  kwa ajili ya uwekezaji,”amesema Msomoka

Aidha amesema kuwa   mbali na ujenzi  huo Mkikita  wanatarajia kuboresha thamani ya korosho kwa kutoa pembejeo na  mbinu mbalimbali kwa wakulima ambapo wanatarajia kuingia mkataba na Umoja wa wakulima korosho Tandahimba(Uwokota) na Kitama Farmers

Naye Mkurugenzi wa Mtandao wa Kijani Kibichi (Mkikita) Adam Ngamange amesema kuwa lengo ni  kuongeza thamani ya zao la korosho sambamaba na kuwashawishi wawekezaji wa viwanda na kufungua kliniki ya kilimo  ya mazao mbalimbali

“Lengo la mtandao wetu wa kijani kibichi  ni pamoja na kuongeza thamani ya korosho ,kujenga kliniki ya kilimo kwa mazao mbalimbali ,kutoa mafunzo yanayohusu kilimo sambamba na kuwapa mitaji,pembejeo ,ushauri kuhusu mazao na kutafuta  masoko,”amesema Ngamange

Hata hivyo naye Mwenyekiti wa  Umoja wa wakulima korosho Tandahimba(Uwokota) Shabia Kajete amesema uwekezaji huo utawasaidia wakulima kupata  huduma bora karibu yao

“Mtandao huu ukijenga kiwanda na ghala utatusaidia sisi wakulima kwakuwa wakulima wengine wanabangua korosho zao lakini wanakosa mahali pa kupeleka  korosho hizo lakini sasa hivi watapunguza tatizo hilo kwa wakulima,”amesema Kajete